"Ekoloji Maarifləndirmədə Hüquqi Tənzimləmə: Yeni Çağırışlar və Perspektivlər" mövzusunda dəyirmi masa keçirilib
"Konstitusiya və Suverenlik İli" çərçivəsində Naxçıvan Dövlət Universitetinin Elmi Kitabxanasında "Naxçıvan Ekoloji Maarifləndirmə və Ətraf Mühitin Mühafizəsinə Dəstək" İctimai Birliyinin tərəfdaşlığı, birliyin fəal üzvü, NDU nəzdində Naxçıvan Dövlət Texniki Kollecinin tələbəsi Cavad Bayramlının təşkilatçılığı ilə "Ekoloji Maarifləndirmədə Hüquqi Tənzimləmə: Yeni Çağırışlar və Perspektivlər" mövzusunda dəyirmi masa keçirilib. Dəyirmi masanın məqsədi ekoloji hüquqi maarifləndirmənin əhəmiyyətini vurğulamaq, mövcud qanunvericilik çərçivəsində ekoloji problemlərin həlli yollarını müzakirə etmək, vətəndaş cəmiyyəti olaraq bu işə ictimai nəzarəti gücləndirmək olub.
Dəyirmi masada Naxçıvan Dövlət Universiteti Elmi Kitabxanasının direktor müavini Aysu Rəsulzadə, Naxçıvan regional ASAN xidmət mərkəzinin könüllülər üzrə məsul şəxsi Aynur Məmmədova, Birliyin idarə heyəti üzvləri və gənc eko fəallar iştirak ediblər. Tədbirdə ekoloji problemlərin, ətraf mühitin mühafizəsinin hüquqi çərçivədə tənzimlənməsi, konstitusion hüquqların təmin olunması, eləcə də ekoloji maarifləndirmənin gücləndirilməsi istiqamətində bundan sonra atılacaq qabaqcıl addımlar geniş müzakirə olunub.
