“Novruz bayramı milli – mənəvi dəyərlərimizin əbədiyaşarlıq rəmzidir”.
Naxçıvan Dövlət Universitetinin Elmi Kitabxanasında “Novruz bayramı milli – mənəvi dəyərlərimizin əbədiyaşarlıq rəmzidir” mövzusuna həsr olunmuş dəyirmi masa keçirilib.Tədbiri giriş sözü ilə açan universitetin rektoru, AMEA-nın müxbir üzvü Saleh Məhərrəmov bayram münasibətilə müəllim və tələbələri təbrik edib, milli-mənəvi dəyərlərimizdən və onlar içərisində Novruzun xüsusi yeri olmasından danışıb. Vurğulanıb ki, Ümummili lider Heydər Əliyevin təşəbbüsünün nəticəsi olaraq ölkəmizdə illərdir Novruz bayramı geniş şəkildə - rəsmi dövlət bayramı kimi qeyd edilir. Rektor dünyada sülh və birgə yaşayışın təmin edilməsi məqsədilə hər kəsi Novruzun aşıladığı milli dəyərləri qorumağa və onları gələcək nəsillərə ötürməyə çağırıb. Naxçıvan folkloru və Novruz adət-ənənələri mövzusunda filologiya üzrə fəlsəfə doktoru, dosent Sədaqət Nemətova bayramın ölkəmiz və xalqımız üçün tarixi və mədəni əhəmiyyətindən danışaraq bildirib ki, əsrlər boyu Azərbaycan xalqı bu bayramı qeyd edib, milli adət-ənənələri öz qəlbində yaşadıb. Sonda Tarix-fiologiya fakültəsi tələbələrinin Novruz bayramı münasibətilə fikirləri dinlənilib.
