“Biocoğrafiya” kitabının təqdimetmə mərasimi keçirilib.
02.03.2018-ci ildə Naxçıvan Dövlət Universitetinin Elmi Kitabxanası daha bir kitabtəqdimatı mərasiminə bələdçilik etdi.Təqdimat mərasimi universitetin rektoru, AMEA-nın müxbir üzvü, biologiya elmləri doktoru, professor Saleh Məhərrəmov və biologiya üzrə fəlsəfə doktoru, dosent İsmayıl Sadiqovun birgə ərsəyə gətirdikləri “Biocoğrafiya” kitabına həsr olunmuşdu.Təqdimatı giriş sözü ilə açan universitetin elmi işlər üzrə prorektoru, fizika-riyaziyyat üzrə fəlsəfə doktoru, dosent Mübariz Nuriyev kitabı universitetin 50 illiyinə qiymətli bir töhvə olaraq dəyərləndirib, coğrafiya və biocoğrafiya elmi haqda məlumat verib. Zoologiya kafedrasının müdiri, biologiya üzrə fəlsəfə doktoru, dosent Həbib Hüseynov kitab haqqında ümumi məlummat verib. Daha çox xarici ədəbiyyatdan istifadə olunan dərslik biologiya və coğrafiya sahəsində əldə edilmiş son nailiyyətlərə əsasən tərtib edilib. Kitabda biocoğrafiyanın inkişaf tarixi, biosferin xüsusiyyətləri, maddələr dövranı, bitki və heyvanat aləminin bioloji-ekoloji xüsusiyyətləri, biosenoz, biogeosenoz və ekosistem, müxtəlif zonların biomları, biocoğrafiya və bioloji müxtəlifliyin qorunma problemləri və.s məsələlər geniş izah edilib. Coğrafiya kafedrasının müdiri, coğrafiya üzrə fəlsəfə doktoru, dosent Əli Həsənov vurğulayıb ki, universitetin coğrafiya və ekologiya ixtisası tələbələri üçün nəzərdə tutulan kitabdan ixtisas üzrə təhsil alan tələbələr, həmçinin bu sahədə elmi iş aparan tədqiqatçılar, müəllimlər də istifadə edə bilər. Coğrafiya müəllimliyi ixtisası üzrə II kurs tələbəsi Kazım Kazımov kitab haqqında öz fikirlərini bildirib. Sonda tədbir iştirakçılarının kitab haqda müzakirələri dinlənilib.
