LİTVA VƏ LATVİYA SƏFİRLƏRİ NAXÇIVAN DÖVLƏT UNİVERSİTETİNDƏ
Litva Respublikasının Azərbaycandakı fövqəladə və səlahiyyətli səfiri Valdas Lastauskas və Latviya Respublikasının ölkəmizdəki fövqəladə və səlahiyyətli səfiri Yuris Maklakovs Naxçıvan Muxtar Respublikasına rəsmi səfərləri çərçivəsində Naxçıvan Dövlət Universitetində də olublar. Universitetin rektoru, AMEA-nın müxbir üzvü Saleh Məhərrəmov qonaqları salamlayaraq muxtar respubikada dövlət qayğısı sayəsində əldə olunan təhsilin inkişaf göstəricilərindən danışıb, universitetin strukturu, maddi-texniki bazası, professor-müəllim heyəti, mövcud fakükltə və ixtisaslar haqqında ətraflı məlumat verib. Səfirlər ilk olaraq Elmi kitabxananın fondu, elektron kataloq-kartoteka sistemi, elektron kataloq köşkü və İnternet mərkəzinin fəaliyyəti ilə tanış olublar. Universitetin İnformasiya-Kommunikasiya Texnologiyaları Mərkəzində müasir elektron təhsil şəbəkəsinin idarə olunması, universitetin bütün binalarının şəbəkə fiber optik kabellə birləşdirilməsi, kamera-nəzarət sistemi, 108 hektarlıq kampusu əhatə edən “Wi-Fi” simsiz internet şəbəkəsi qonaqlar tərəfindən maraqla qarşılanıb.
